Hjalti Parelius fagnaði stórum samningi við Alvogen

Myndlistarmaðurinn Hjalti Parelius Finnsson hefur verið ráðinn til að mála þrjú risastór olíumálverk í nýjar höfuðstöðvar Alvogen í Vatnsmýrinni. Þetta er stærsti samningur sem íslenskur myndlistamaður hefur fengið í rúmlega hálfa öld. Hjalti bauð til kokteilboðs í Reykjavik Modern Art Gallery í gær til að fagna þessum áfanga ásamt góðum gestum.

Verkefnið er afar umfangsmikið og vinna við það mun taka tvö ár. Alls verða verkin rúmlega 100 fm að stærð og verða afhjúpuð árið 2016. Fram að þeim tíma mun Hjalti ekki geta sinnt neinum öðrum verkefnum.

„Þetta er mikill heiður fyrir mig og ég er þakklátur fyrir það traust sem mér er sýnt. Þetta er gríðarlega umfangsmikið verk og á sama tíma mjög spennandi fyrir mig sem myndlistarmann,” segir Hjalti Parelius.

Hjalti hefur vakið mikla athygli fyrir verk sín og er hvað þekktastur fyrir olíumálverk þar sem teiknimyndamótíf eru í forgrunni.