Ronaldo veit ekki aura sinna tal

Cristiano Ronaldo, stórstjarna Real Madrid og portúgalska landsliðsins, hefur ekki hugmynd um hvað hann á mikinn pening á bankabókinni sinni.

„Ég veit ekki hvað ég á mikinn pening. Það eru ekki peningar sem hvetja mig áfram,“ er haft eftir Ronaldo í breska blaðinu The Sun í dag.

„Þegar ég átti ekkert þá skipti þetta mig miklu máli. Fjölskylda mín var mjög fátæk þegar ég var að alast upp og fékk ég aldrei leikföng eða jólagjafir,“ bætti hann við.

Ronaldo er sagður vera með meira en 50 milljónir króna í vikulaun á Spáni en hann var fyrr í vikunni útnefndur markaðsvænsti knattspyrnumaður heims samkvæmt úttekt fyrirtækisins Repucom.

Hann vonast til að geta spilað knattspyrnu þar til hann verði fertugur og að hann verði settur í sama flokk og Pele og Maradona þegar hann hættir. „Ég vil komast á sömu blaðsíðu í sögubókunum og þeir,“ sagði kappinn.