Fyrsta hryðjuverkaákæra í sögu Finnlands

Ríkissaksóknari í Finnlandi hefur gefið út hryðjuverkaákæru á hendur fjórum mönnum, en þetta er sú fyrsta sinnar tegundar í sögu landsins.

Fjórmenningarnir eru grunaðir um að hafa sent háar fjárhæðir til hryðjuverkasamtakanna al-Shabaab í austurhluta Afríku.

Í ákærunni kemur fram að fjórmenningarnir hafi safnað saman fleiri þúsund evra á árunum 2008 til 2011. Einn er jafnframt grunaður um að hafa safnað nýjum liðsmönnum fyrir hryðjuverkasamtökin með það að markmiði að þeir fremji hryðjuverk.

Í frétt Hbl segir að maðurinn sé grunaður um að hafa fengið bróður sinn, sem hafði þá nýverið verið sleppt úr fangelsi í Afríku, til að ganga til liðs við al-Shabaab. Þá sé hann grunaður um að hafa undirbúið rán á 15 og 17 ára gömlum börnum bróður síns með það í huga að senda þau í æfingabúðir hryðjuverkasamtakanna.

Við rannsókn voru um fjörutíu manns yfirheyrðir. Fjórmenningarnir neita allir sök.