Feðgar rækta kannabis

Tveir feðgar, faðirinn tæplega fimmtugur og sonurinn tæplega tvítugur voru handteknir í gær eftir að lögreglan fann á annan tug kannabisplantna í íbúð í fjölbýlishúsi í Breiðholti, sem þeir hafa til umráða.

Hald var lagt á plönturnar og málið sent til ákæruvaldsins að yfirheyrslum loknum. Um tvö leitið í nótt lagði lögreglan svo hald á nokkrar kannabisplöntur í íbúð, skammt frá hinni fyrri, og handtók eigandann, sem er um þrítugt. Töluvert af tilbúnu kannabisefni fannst líka í íbúðinni. Honum var sleppt að yfirheyrslum loknum, en plöntunum og efninu verður fargað.