„Ég dey ef ég dey“

Tónlistarmaðurinn Morrissey segir í viðtali við spænska blaðið El Mundo að hann hafi gengist undir nokkrar krabbameinsmeðferðir síðasta eina og hálfa árið.

„Þeir eru búnir að fjarlægja krabbameinsvefi fjórum sinnum nú þegar en hvað um það,“ segir Morrissey.

„Ég dey ef ég dey. Ef ég geri það ekki þá geri ég það ekki. Mér líður vel akkúrat núna. Og ég veit að ég lít óheilsusamlega út á nýjum myndum en það er það sem sjúkdómurinn gerir. Ég ætla ekki að hafa áhyggjur af því. Ég get hvílt mig þegar ég er dauður,“ bætir hann við.

Þetta er í fyrsta sinn sem Morrissey segir frá krabbameininu en hann var greindur með blæðandi magasár snemma árs 2013, tvöfalda lungnabólgu í mars sama ár og matareitrun í júlí árið 2013. Hann fékk síðan sýkingu í öndunarfærin í júní í ár. 

Morrissey ýjar að því í samtali við El Mundo að hann ætli að hætta að búa til tónlist en hann er nú að vinna að sinni fyrstu skáldsögu sem kemur vonandi út á næsta ári.

„Með heppni get ég hætt að syngja að eilífu sem myndi gleðja marga!“ segir hann.