Á ekki að draga úr vægi trúarlegs efnis í hátíðardagskrá RÚV

Skarphéðinn Guðmundsson, dagskrárstjóri RÚV, segir að þó svo að jólatónleikar Fíladelfíu-kirkjunnar verði ekki á dagskrá Ríkissjónvarpsins sé ekki verið að draga úr vægi trúarlegs efnis í hátíðardagskránni.

Í samtali við Vísi í lýsti Óskar Einarsson, tónlistarstjóri Fíladelfíu-kirkjunnar, yfir óánægju sinni með ákvörðun stjórnenda RÚV að taka árlega jólatónleika safnaðarins af dagskrá í ár. Óskar fékk bréf frá stjórnendum RÚV og þar voru tvær ástæður nefndar fyrir þessari ákvörðun, annars vegar sú að útsending tónleikanna rúmist ekki innan fjárhagsáætlunar RÚV og hins vegar að ekki sé hægt að réttlæta það að sami hópurinn komist að ár eftir ár.

Í frétt Vísis kom fram að tónleikarnir hafi verið á dagskrá RÚV árlega frá 2001. Skarphéðinn segir það ekki rétt. „Vissulega hafa hinir ágætu árvissu tónleikar Fíladelfíu verið reglulega á dagskrá RÚV á undanförnum árum, þó ekki árlega, því þeir voru til að mynda ekki á dagskrá um þar síðustu jól.“

Skiptir kostnaður raunverulega máli?

Í bréfinu var meðlimum Fíladelfíu-kirkjunnar tjáð að útsending frá tónleikunum rúmaðist ekki innan fjárhagsáætlunar stofnunarinnar. Óskar sagðist í samtali við Vísi gefa lítið fyrir þá útskýringu. „RÚV hefur fengið þetta á silfurfati, þeir hafa ekkert þurft að borga fyrir þetta. Þeir eru bara með sitt fólk í vinnu sem kemur og tekur upp. Við sjáum um hljóðvinnslu og borgum með þessu, það hefur verið allt að ein og hálf milljón sem við borgum með. Þannig að þetta snýst ekkert um kostnað.“

Þegar Skarphéðinn dagskrárstjóri er spurður út í það hvort kostnaður hafi í raun haft áhrif á þessa ákvörðun stjórnenda RÚV að taka Fíladelfíu-tónleikana af dagskrá, svaraði hann svo:

„Að sjálfsögðu þarf RÚV að kosta talsverðu til við upptöku á svo viðamiklum tónlistarviðburði, bæði í launa- og tækjakostnaði. Slíkt fæst aldrei á silfurfati þótt framlag Fíladelfíunnar til dagskrárgerðarinnar hafi vissulega verið ríkulegt, rausnarlegt og ákaflega vel þegið. Það liggur í augum uppi að þegar fjárráð eru takmörkuð þarf að forgangsraða, að velja og hafna, og seint verður hægt að sinna og bjóða upp á allt það áhugaverða efni og viðburði sem okkur standa til boða.  Fjölbreytni í verkefnavali er eitt af okkar forgangsmálum, að leita leiða til að sinna fleirum af þeim einstaklega frambærulegu menningarviðburðum sem í boði eru og það framar öðru réði ákvörðun okkar að þessu sinni.

En ég ítreka að það eru fullur vilji til að bjóða í framtíðinni upp á upptökur frá hinum vinsælu tónleikum Fíladelfíu, rétt eins og aðra frambærilega menningarviðburði, árvissa eða einstaka.

Mikið úrval

Skarphéðinn segir að ekki standi til að „draga úr trúarlegum vísunum í komandi hátíðardagskrá RÚV“.

„Nægir þar að nefna að boðið verður uppá upptöku frá jólatónleikum Rásar 1 sem haldnir verða í Langholtskirkju undir stjórn Jóns Stefánssonar en þar verður á efnisskrá þjóðleg jólatónlist í flutningi Graduale nobili. Það er mjög mikið framboð af afar frambærilegum jólatónleikum og viljum við framar öllu stuðla að fjölbreytni í verkefnavali og finna svigrúm til að sinna fleiri viðburðum en gert hefur verið á liðunum árum.“

Hann segir að það geti vel verið að jólatónleikar Fíladelfíu-kirkjunnar verði aftur á dagskrá RÚV í framtíðinni. svigrúm til að sinna fleiri viðburðum en gert hefur verið á liðunum árum. Við útilokum því alls ekki að boðið verði aftur upp á tónleika Fíladelfíu að ári, sé áhuginn gagnkvæmur, enda einkar vel heppnaður tónlistarviðburður og vinsæll. Við þetta má svo bæta að upptaka frá aftansöng jóla verður að sjálfsögðu á sínum stað í dagskrá sjónvarps á aðfangadagskvöld.“