Menntamálaráðherra býður kennurum breytingar á skólakerfinu

Menntamálaráðherra vonar að ekki komi til verkfalls hjá framhaldsskólakennurum sem myndi hafa alvaregar afleiðingar fyrir nemendur. Hann segir styttingu framhaldsskólanámsins bjóða upp á hagræðingu í skólunum sem nýta megi til að bæta kjör kennara.

Framhaldsskólakennarar hafa komið þeim skilaboðum vandlega á framfæri að þeir muni ekki sætta sig við þær launahækkanir sem samið var um á almenna markaðnum í desember. Í fréttum Stöðvar tvö á sunnudag sagði Aðalheiður Steingrímsdóttir formaður Félags framhaldsskólakennara að ríkið hefði þessa viku til að skýra afstöðu sína til samninga en eftir það myndu kennarar meta stöðuna og mögulegar aðgerðir, eða verkfall.

Illugi Gunnarsson menntamálaráðherra er engu að síður bjartsýnn á lausn deilunnar, það sé áhyggjuefni ef framhaldsskólakennarar fari í verkfall.

„Jú það væri mikið áhyggjuefni. En ég er samt sem áður ágætlega bjartsýnn á að það sé til möguleg lausn í þessari stöðu,“ segir menntamálaráðherra.

Menn séu þó bundnir af þeim samningum sem gerðir hafi verið á almenna markaðnum og stöðu ríkissjóðs. Hins vegar hafi hann rætt um mögulegar endurbætur á framhaldsskólakerfinu sem miði að því að gera kerfið betra.

„En um leið líka eru möguleikar á að það sparist fjármunir við slíkar breytingar. Ég vil þá gjarnan að það sé notað til að bæta kjör kennara,“ segir Illugi.

Kennarar segja að kjör þeirra hafi dregist aftur úr sambærilegum stéttum hjá hinu opinbera frá því fyrir hrun og þar muni um 17 prósentum og segja þolinmæðina á þrotum. Menntamálaráðherra kemur ekki beint að kjarasamningum þar sem þeir eru í höndum fjármálaráðherra og Illugi hefur ekki beitt sér beint í kjaraviðræðunum með hugmyndum sínum um breytingar á framhaldsskólakerfinu.

En er það eitthvað sem getur gerst strax við gerð þessara kjarasamninga, nú er tíminn þér ekki hliðhollur hvað það varðar?

„Nei, en menn geta þá séð fyrir sér að þeir nái þá samkomulagi um þessa aðgerð og hún mun auðvitað taka nokkur ár í framkvæmd,“ segir Illugi.

Vilji menn hins vegar fara í þessar krefisbreytingar, m.a. með styttingu framhaldsskólanámsins í þrjú ár og leggi af stað í þá vegferð megi með því bæta kjör kennara.

Fælist hagræðingin þá í því að það yrðu færri kennarar og þá meira til skiptanna?

„Nú er það þannig, og það er eitt af þeim atriðum sem skipta hér máli hvað varðar framhaldsskólakennarana, að meðalaldur þeirra er mjög hár. Þannig að við sjáum fram á það á næstu árum að það eru mjög margir að fara úr starfi bara vegna aldurs. Þannig að það hjálpar okkur í þessu. Þetta gerist ekki bara á einu ári. Þetta tekur tíma,“  segir Ilugi Gunnarsson menntamálaráðherra.