Múbarak ekki dæmdur fyrir morð á mótmælendum

Dómstóll í Egyptalandi hefur vísað frá dómi öllum ákærum gegn Hosní Múbarak, fyrrverandi forseta landsins, sem snúa að drápi 239 mótmælenda í byltingu gegn honum árið 2011.

Múbarak, fyrrverandi innanríkisráðherra hans og sex aðrir voru dæmdir í lífstíðarfangelsi í júní 2012 fyrir að hafa lagt á ráðin um að drepa mótmælendurna en í fyrra var málið tekið upp á ný vegna tæknilegra atriða. Múbarak, sem er 86 ára, er nú þegar að afplána þriggja ára dóm fyrir að draga sér fé frá hinu opinbera.

Samanlagt er talið að um 800 mótmælendur hafi látið lífið í átökunum 2011, en ákærurnar gegn Múbarak snéru aðeins að þessum 239.

Samkvæmt fréttastofu BBC brutust út mikil fagnaðarlæti í dómsal þegar dómari kvað upp úrskurð sinn. Margir ættingjar hinna látnu eru þó gríðarlega ósáttir.

„Þessi úrskurður þýðir að enginn hefur verið látinn bera ábyrgð á drápum rúmlega 800 manns,“ er haft eftir egypskum fréttamanni. „Það er líkt og hinir látnu hafi framið fjöldasjálfsmorð.“