Hodgson: Besti leikur liðsins undir minni stjórn

"Þetta var besti leikur liðsins undir minni stjórn," sagði Roy Hodgson, landsliðsþjálfari Englands, við BBC eftir tapið gegn Ítalíu í Manaus í gær.

"Það er erfitt að kyngja vonbrigðunum. En ég er þess fullviss að við munum spila nógu vel í næstu tveimur leikjum til að komast upp úr riðlinum," sagði Hodgson en England mætir Úrúgvæ á fimmtudaginn og Kosta Ríka á þriðjudaginn eftir viku.

"Við erum ekki lið sem liggur til baka og því miður gáfum við Ítölum eitt eða tvö færi til að skora.

"En við erum með ungt lið og næstum því tveir þriðju af leikmönnunum í hópnum eru að taka þátt á sínu fyrsta HM," sagði Hodgson sem var ánægður með frammistöðu einstakra leikmanna, þ.á.m. Raheems Sterling sem lék sinn fyrsta leik á stórmóti í gær.

"Mér fannst Raheem Sterling vera mjög hættulegur allan leikinn. Danny Welbeck átti sín augnablik og Steven Gerrard og Jordan Henderson gerðu allt sem ætlast var til af þeim," sagði Hodgson sem hrósaði einnig Wayne Rooney sem lék á vinstri kantinum í gær.

"Rooney gerði vel. Við vitum að hann getur spilað nokkrar stöður og hann getur verið ánægður með sína frammistöðu," sagði Hodgson að endingu.