Þungavopn færð af víglínunum í Úkraínu

Úkraínuher og aðskilnaðarsinnar munu draga stórskotalið og brynvarða bíla af 30 kílómetra breiðu svæði í Austur-Úkraínu. Hreyfingarnar eru liður í samkomulagi sem náðist á milli stjórnvalda í Kænugarði og í Moskvu síðasta föstudag.

Samkvæmt því munu bæði Úkraínuher og aðskilnaðarsinnar færa þungavopn sín fimmtán kílómetra frá víglínum. Er þar talað um stórskotabyssur og skriðdreka. Þannig á að skapa ákveðið hlutlaust svæði á milli fylkinga.

Þrátt fyrir að vopnahlé sé í gildi hafa bardagar geysað víða í Austur-Úkraínu.

Reuters fréttaveitan hefur eftir Andri Lysenko, talsmanni Úkraínuhers, að tveir hermenn hafi fallið í stórskotaárásum aðskilnaðarsinna um helgina. Þrátt fyrir það hafi þeir fundið fyrir mikilli fækkun árása undanfarna daga. Þá hafa þeir ekki orðið varir við árásir frá Rússlandi heldur.