Assou-Ekotto skallaði liðsfélaga sinn

Benoit Assou-Ekotto, leikmaður QPR í Englandi, skallaði liðsfélaga sinn í landsliði Kamerún undir lok leiksins gegn Króatíu í gær.

Króatar unnu 4-0 sigur en fyrr í leiknum lét Alex Song reka sig af velli fyrir að lemja Mario Mandzukic í bakið.

Assou-Ekotto byrjaði svo að rífast við Benjamin Moukandjo, liðsfélaga sinn, í uppbótartíma leiksins með þeim afleiðingum að Assou-Ekotto skallaði hinn.

Ósættið hélt áfram þegar leikmenn gengu til búningsklefa og þurfti Samuel Eto'o, sem gat ekki spilað vegna meiðsla í gær, að stíga á milli þeirra.

„Þetta er ótrúlegt. Ég sá þegar þetta gerðist og ég þarf að komast að því nákvæmlega hvað gerðist. Af hverju þessir tveir leikmenn sprungu,“ sagði landsliðsþjálfarinn Volker Finke við fjölmiðla eftir leik í gær.

„Þetta finnst mér leiðinlegt að sjá. Kamerún vill ekki vera þekkt fyrir svona hegðun.“

Finke baðst afsökunar á úrslitum leiksins. „Þetta er virkilega sárt. Við höfðum enga stjórn á leiknum og mér líkaði ekki við hegðun leikmannanna. Við verðum að líta nú til framtíðar enda á liðið marga framtíðarmenn.“