Harðnandi átök á milli Shía og Súnnía

Fjórtán hið minnsta eru látnir eftir að öflug bílsprengja sprakk í Bagdad höfuðborg Íraks í nótt. Rúmlega fimmtíu manns eru sárir og er óttast að tala látinna eigi eftir að hækka.

Mikið tjón varð í sprengingunni, rúður brotnuðu í fjölmörgum byggingum og bifreiðar urðu eldi að bráð. Hverfið sem sprengingin varð í er að mestu byggð Shía múslimum en átök á milli Shía og Súnnía hafa farið vaxandi í landinu undanfarið.

Þá var þremur sprengjum varpað inn á hið svokallaða Græna Svæði í borginni í nótt, en þar hafast við fulltrúar erlendra ríkja og hjálparstofnana. Ekki er ljóst hvort einhver hafi slasast í því atviki.