Kokteilmeistari sýnir listir sínar

Á seinustu árum hefur orðið bylting í kokteilmenningu á Íslandi. Nú er enginn bar með börum nema boðið sé upp á dýrindis kokteila og barþjónninn sé jafnvígur á barnum og kokkurinn er í eldhúsinu.

Slippbarinn fékk í heimsókn Bretann Tim Judge sem er stjarna í barþjónaheiminum en þegar blaðamann og ljósmyndara bar að garði var hann að undirbúa Master Class á barnum en það var Ölgerðin sem fékk hann til landsins. Judge er svokallaður „global brand ambassador“ fyrir Bulleit-viskí, Ron Zacapa-romm og fleiri tegundir ásamt því að vera kennari í World Class Bartending, virtustu barþjónakeppni heims.

„Ég kom frá Lundúnum á mánudaginn og hef síðan verið að vinna með bestu barþjónum Íslands. Ég hef verið að kynna þeim Bulleit-búrbon og rúgviskí ásamt því að tala um sögu amerísks viskís. Það er mjög áhugavert af því að það er ekki hægt að tala um sögu amerísks viskís án þess að tala um sögu Ameríku sjálfrar,“ segir Judge.

Hann sýndi okkur hvernig á að gera hinn fullkomna mint julep-kokteil. „Þetta er sígildur drykkur og var vinsælasti kokkteill Ameríku á 19. öld, rétt eins og Martini var á 20. öldinni. Þetta er einn umræddasti kokteill allra tíma, gríðarlegt magn af prósa og ljóðum hefur verið skrifað um hann og hann hefur jafnvel komið fyrir í The Simpsons,“ segir hann.