Pelé: England og Brasilía eiga jafna möguleika

Pelé, einn besti knattspyrnumaður sögunnar og þrefaldur heimsmeistari með Brasilíu, segir að Úrúgvæ sé óskamótherji Brasilíu í úrslitaleik HM sem fer fram á Maracana vellinum þann 13. júlí.

"Ég vil helst að Brasilía mæti Úrúgvæ í úrslitaleiknum, því þá getum við náð fram hefndum," sagði Pelé og vísaði þar til úrslitaleiks HM 1950 þar sem Úrúgvæ vann óvæntan 2-1 sigur á Brasilíu á Maracana.

Pelé var einnig spurður út í möguleika enska landsliðsins sem hann sagði góða.

"England, líkt og Brasilía, Ítalía og Frakkland, hafa mikla hefð. Við verðum að vera tilbúnir að mæta þeim.

"Við verðum að bera virðingu fyrir enska landsliðinu því það á jafna möguleika og Brasilía," sagði Pelé, sem skoraði 77 mörk í 92 landsleikjum á árunum 1957-1971.