Brasilía ekki í vandræðum með Panama

Brasilía vann öruggan sigur á Panama í fyrri æfingarleik liðanna sem hluti af undirbúning brasilíska liðsins fyrir Heimsmeistaramótið sem framundan er.

Það tók Brasilíu hálftíma að skora fyrsta mark leiksins en sigurinn var aldrei í hættu.

Miklar væntingar eru gerðar til gulldrengsins frá Brasilíu, Neymar, fyrir mótið og hann var í fínu formi í dag. Neymar skoraði fyrsta mark leiksins áður en liðsfélagi hans hjá Barcelona, Dani Alves bætti við marki stuttu fyrir lok fyrri hálfleiks.

Neymar lagði upp þriðja mark leiksins fyrir ofurmanninn Hulk á fyrstu mínútu seinni hálfleiks. Willian gerði endanlega út um leikinn með skoti af stuttu færi um miðbik seinni hálfleiks.

Brasilía tekur á móti Króatíu í opnunarleik HM sem fer fram eftir rúmlega viku.