Karlmenn hafa hunsað umræðuna um jafnrétti og ofbeldi

Guðrún Jónsdóttir, talskona Stígamóta, segir í stöðuuppfærslu á Facebook-síðu samtakanna að hún hafi fengið margar fyrirspurnir frá reiðum konum víðs vegar að úr heiminum sem bíði eftir því að heyra hvað íslenskir femínistar hafa um karlaráðstefnuna Barbershop að segja.

Guðrún segir að með ráðstefnu íslenskra stjórnvalda sé karlmönnum formlega boðið að taka þátt í jafnréttisbaráttunni. Hún bendir hins vegar á að karlar hafi í gegnum tíðina haft greiðan aðgang að umræðunni um jafnrétti og ofbeldi en þeir hafi hins vegar hunsað umræðuna. Guðrún segir að ástæðan sé óþægilega einföld:

„Allt of mörgum hefur hentað það ljómandi að ástandið breyttist ekki. Þeir hafa völdin, launin og ofbeldi karla gegn konum hefur verið áhrifarík leið til þess að viðhalda ástandinu. Nú er þeim boðið að eiga sviðið, baðað fjölmiðlaljósum. Þeim verður hlíft við því að þurfa að hlusta á allar kerlingarnar sem hafa verið að streða síðustu hundrað árin, þeir fá frið til þess að greina ástandið sjálfir.“

Guðrún segir að það togist á í sér hvað sé rétt og spyr hvort allt væri orðið gott ef karlar hefðu bara fengið að fara yfir jafnréttismálin og ofbeldið sérstaklega. Hún bendir á að á Nordisk Forum ráðstefnunni í sumar hafi 20.000 konur og þeir karlar sem vildu taka þátt lagt fram kröfugerð þess efnis að Norðurlöndin yrðu jafnréttisparadís. Guðrún segir svo í lok færslunnar:

„Það verður fróðlegt að heyra hver niðurstaða karlanna á Rakarastofuráðstefnunni verður og bera hana saman við kröfur norrænna kvenna. Áhugaverðast verður að fylgjast með því hvort Ísland ætlar að láta duga að hleypa körlunum að hljóðnemunum um jafnrétti eða hvort áherslur og dagskrá Íslands og Norðurlandanna allra í tilefni af tuttugu ára afmæli Pekingáætlunarinnar munu taka mið af kröfugerðinni frá Nordisk forum í sumar.“

Hér að neðan má sjá færslu Guðrúnar um málið í heild sinni.

Post by Stígamót Gegn Kynferðisofbeldi.