Sturridge: Stór dagur í mínu lífi

Daniel Sturridge gerði í dag fimm ára samning við Liverpool en talið er að hann muni færa honum allt að 30 milljónir króna í vikulaun.

Sturridge er 25 ára sóknarmaður sem kom til Liverpool frá Chelsea í janúar árið 2013. Hann hefur síðan þá skorað 36 mörk í 52 leikjum með Liverpool.

„Þetta er stór dagur í mínu lífi nú þegar ég hef ákveðið að helga þessu félagi mín bestu ár sem eru öll fram undan,“ sagði Sturridge í viðtali á heimasíðu Liverpool.

Hann segir að það hafi verið auðveld ákvörðun að ganga að samningnum. „Ég hef verið mjög ánægður með margt sem hefur gerst en það eru enn betri hlutir í vændum.“