Uppáhaldslið Páfans suður-amerískur meistari í fyrsta sinn

San Lorenzo frá Argentínu vann í gær Copa Libertadores í fyrsta sinn í sögu félagsins eftir sigur á Nacional frá Paragvæ í tveimur leikjum. Copa Libertadores er eins konar Meistaradeild Suður-Ameríku, þar sem bestu lið álfunnar keppa sín á milli.

San Lorenzo vann Bolívar frá Bólivíu í undanúrslitunum, samanlagt 5-1, á meðan Nacional hafði betur gegn Defensor Sporting frá Úrúgvæ, samanlagt 2-1.

San Lorenzo og Nacional skildu jöfn með einu marki gegn einu í fyrri úrslitaleiknum sem fór fram í Asunción, höfuðborg Paragvæ.

Mauro Matus kom argentínska liðinu yfir á 64. mínútu, en Julio Santa Cruz - bróðir Roque Santa Cruz - jafnaði leikinn úr vítaspyrnu í uppbótartíma.

Aðeins eitt mark var skorað í seinni leiknum í Buenos Aires. Það gerði Paragvæinn Néstor Ortigoza úr vítaspyrnu á 36. mínútu eftir að Ramon Coronel, varnarmaður Nacional, hafði handleikið boltann innan vítateigs.

Fleiri urðu mörkin ekki og San Lorenzo fagnaði þar með sínum fyrsta sigri í Copa Libertadores, en sigurinn tryggði argentínska liðinu einnig sæti á HM félagsliða, þar sem San Lorenzo verður fulltrúi Suður-Ameríku.

Þetta er í fyrsta sinn í fjögur ár sem brasilískt lið stendur ekki uppi sem sigurvegari í keppninni.

Þess má geta að San Lorenzo er uppáhaldslið Frans páfa, en hann tók á móti liðinu í Vatíkaninu eftir að það varð argentínskur meistari í fyrra.