Müller vill fund með yfirmönnum Bayern

Thomas Müller, framherji Þýskalandsmeistara Bayern München, ætlar að ræða við forráðamenn félagsins á næstu dögum til að fá að vita hver framtíð hans er hjá félaginu.

Müller er einn af fjölmörgum leikmönnum sem orðaðir eru við Manchester United en nýr knattspyrnustjóri félagsins, Hollendingurinn Louis van Gaal, gaf Müller sitt fyrsta tækifæri í Bayern-liðinu fyrir fimm árum.

„Ég er kominn á þann stað á ferlinum að ég vil vita hvort ég verði lykilmaður í byrjunarliði Bayern á næsta tímabili og hvort félagið vilji halda mér í framtíðinni,“ segir Müller í viðtali við þýskt tímarit.

„Þess vegna vil ég fá þennan fund. Ég er ekki einn af þeim leikmönnum sem þegir bara og gerir það sem honum er sagt og leyfi öðrum að koma fram við mig eins og þeir vilja.“

„Það er alltaf erfiðara að vera frá München þegar þú spilar fyrir Bayern en við sem ólumst upp hjá félaginu erum grasrótin í félaginu!“ segir Thomas Müller.