Fyrirtækjum hefur fjölgað við Hafnargötuna

Um 120 fyrirtæki eru eru starfandi við Hafnargötuna í Reykjanesbæ í dag, samkvæmt könnun sem kynnt er í nýjasta tímariti Faxa.

Um 50 starfsgreinar eiga sína fulltrúa við Hafnargötuna og þar starfa um 500 manns að sögn Helga Hólm, sem framkvæmdi talninguna.

„Þessi niðurstaða gefur því vissulega tilefni til bjartsýni á komandi árum,“ skrifar Helgi Hólm í inngang umfjöllunarinnar.

Helgi gerði svipaða talningu á fyrirtækjum við Hafnargötuna árið 2004 en þá voru 84 fyrirtæki starfandi þar og er því um 43 prósenta aukningu að ræða á 10 árum.

„Þetta er vissulega ánægjulegt. Fjöldi fyrirtækja hefur sveiflast nokkuð eftir árum, helst áberandi þegar verslunarbil á neðri hæðum eru laus en það er ánægjulegt að þetta skuli vera raunin,“ segir Árni Sigfússon bæjarstjóri.

Samkvæmt umfjöllun Faxa risu fyrstu húsin við Hafnargötuna á árunum 1785-1804 en Hafnargatan hlaut fyrst nafn sitt 1908.