Verjendur Mladic segja hann föðurlandsvin

Verjendur Ratko Mladic, fyrrum hershöfðingja í her Bosníu-Serba, hófu í dag málflutning sinn hjá Alþjóða stríðsglæpadómstólnum í Haag. Mladic er sakaður um þjóðarmorð og glæpi gegn mannkyninu frá því í Bosníustríðinu sem stóð yfir frá 1992 til 1995.

Frá þessu greinir BBC. Hinn 72 ára Mladic er með þeim allra þekktustu einstaklingunum sem dregnir hafa verið fyrir dómstólinn. Kærurnar gegn honum eru ellefu talsins og hann neitar þeim öllum.

Meðal annars er honum gert að sök að hafa skipað mönnum sínum að skjóta á óbreytta borgara í umsátrinu um borgina Sarajevo sem stóð yfir í þrjú ár og kostaði um tíu þúsund manns lífið. Hann er einnig ásakaður um að hafa komið að fjöldamorðunum í Srebrenica árið 1995, þar sem um átta þúsund íslamskir menn og drengir voru teknir af lífi.  Atburðirnir í Srebrenica eru líklegast mesta voðaverk sem átt hefur sér stað í Evrópu frá seinni heimsstyrjöld.

Verjendur Mladic segja að hann hafi aldrei gert annað en að fylgja skipunum yfirmanna. Sömuleiðis hafa þeir lýst honum sem föðurlandsvini sem barðist til að vernda þjóð sína. Sjálfur hefur Mladic gagnrýnt réttarhöldin og kallað þau „satanísk.“ 

Skoðanir á fyrrum hershöfðingjanum eru skiptar en margir eftirlifendur stríðsins í Bosníu, þá sérstaklega bosnískir múslimar, telja Mladic ábyrgan fyrir því sem þeir þurftu að þola á stríðsárunum. Mladic var handtekinn árið 2011 eftir að hafa verið á flótta frá yfirvöldum í sextán ár. Einnig er um þessar mundir réttað yfir Radovan Karadzic, fyrrum hershöfðingja Bosníu-Serba og félaga Mladic, sem einnig er kærður fyrir þjóðarmorð og glæpi gegn mannkyninu.