Fræðihöfundar mótmæla hástöfum

Verulegur skjálfti er meðal þeirra sem standa að bókaútgáfu á Íslandi, ekki síst þeirra sem gefa út kennslugögn, vegna nýrra fjárlaga.

Félag höfunda fræðirita og kennslugagna lýsir yfir þungum áhyggjum af áformum yfirvalda sem felast í að hækka virðisaukaskatt á bækur. Í fjárlögum er meðal annars ráð fyrir því gert að virðisaukaskattur á bækur hækki úr 7 prósentum í 12. Þetta hefur lagst mjög illa í útgefendur og var Egill Örn Jóhannsson, formaður félags Íslenskra bókaútgefanda afdráttarlaus í samtali við fréttastofu í vikunni, sagði ávísun á hrun.

Útgefendur funda í dag en samkvæmt heimildum Vísis ganga þeir út frá því að þetta muni auka tekjur ríkissjóðs, að óbreyttu, um 150 milljónir, fé sem íslensk útgáfa telur sig ekki eiga. Þar sé af engu að taka og skattalagning sem þessi muni ríða mörgum útgefandanum hreinlega á slig. Hagþenkir, félag höfunda fræðirita og kennslugagna héldu stjórnarfund í gær vegna málsins. Formaður þar er Jón Yngvi Jóhannsson.

„Við höfum náttúrlega verulegar áhyggjur af þessu,“ segir hann í samtali við Vísi.

Kostnaður sem lendir beint á heimilunum

Jón Yngvi áfram: „Stór hluti okkar félagsmanna skrifar fræðirit fyrir almennan markað, sem verða dýrari við þetta. Fræðirit eru oft dýr í framleiðslu og mega kannski ekki við því að hækka ennþá frekar. Svo er það kennslubókamarkaðinn. Allar kennslubækur og námsgögn fyrir framhaldsskóla og háskóla á Íslandi þurfa nemendur sjálfir að kaupa. Og við höfum stórar áhyggjur af því að verð á þessum bókum hækki og salan þá minnki. Þetta hefur verið mjög erfitt undanfarin ár. Framleiðsla á kennslubókum, sérstaklega fyrir framhaldsskóla, hefur minnkað mjög mikið. Þessi hluti bókamarkaðarins má ekkert við frekari erfiðleikum sem myndu skapast með frekari hækkun virðisaukaskattsins.“

Jón Yngvi segir þetta snerta alla sem eru í námi og fjölskyldur þeirra. „Þetta eykur kostnað við menntun sem lendir náttúrlega beint á heimilunum.“

Jón Yngvi segir að þessu verði ekki tekið þegjandi meðal þeirra sem starfa að útgáfumálum, en Hagþenkir er í samstarfi við aðra sem starfa á þeim markaði. Þar muni menn vinna gegn þessum hugmyndum sem mest þeir mega.

Við hljótum að mótmæla

„Einfaldast væri náttúrlega ef menn vilja einfalda virðisaukaskattkerfið, og þá á bókum, væri náttúrlega mjög einföld leið til þess og hún er að hafa hann núll prósent.“

Þið fordæmið þá þessar hugmyndir sem birtast í fjárlögum?

„Fordæma er kannski sterkt að segja. En við höfum klárlega áhyggjur af þessu. Bókamarkaður, bæði sá sem snertir almenna markaðinn og einnig kennslubækur, er mjög viðkvæmur. Það er ekkert sjálfsagt mál að við séum hér með bókamarkað sem virkar í svona litlu málsamfélagi. Allt sem gerir það erfiðara, við hljótum að mótmæla því.“