Yfirmenn Dortmund og Bayern í hart vegna Reus

Hans-Joachim Watzke, framkvæmdastjóri þýska liðsins Borussia Dortmund, er frekar pirraður vegna orða kollega síns hjá Bayern München, Karl-Heinz Rummenigge, um samningamál framherjans MarcoReus.

Rummenigge sagði við þýska miðla í síðustu viku að Bayern færi rólega í það að stela Marco Reus af Dortmund, en félagið er búið að hirða Mario Götze og Robert Lewandowski af Dortmund á síðustu tveimur árum.

Rummenigge upplýsti alla um, að riftunarverð Reus í sumar væri 35 milljónir evra, en ef Bayern biði fram á næsta sumar væri sú tala tíu milljónum evra lægri. Það þýðir að Dortmund getur ekki hafnað 25 milljóna evra tilboði í framherjann næsta sumar skrifi hann ekki undir nýjan samning.

„Borussia Dortmund verður að lýsa yfir pirringi sínum vegna orða Karl-Heinz Rummenigge, og hvernig hann talaði um innanhúsmál Dortmund þrjá daga í röð í fjölmiðlum,“ segir Watzke í yfirlýsingu á heimasíðu Dortmund.

„Það vita allir knattspyrnuáhugamenn hvað vakir fyrir honum með svona yfirlýsingum. Með þessum orðum veit Karl-Heinz Rummenigge að hann er að skemma enn frekar tæpt samband Borussia Dortmund og Bayern München.“

„Við munum ekki frekar en fyrri daginn gefa út neina upplýsingar um samningamál okkar leikmanna opinberlega.“