Kúrdar að ná yfirráðum í Kobane

Kúrdar eru nálægt því að ná yfirráðum í bænum Kobane, sem er á landamærum Tyrklands og Sýrlands, gegn hryðjuverkasamtökum IS. Harðir bardagar hafa þar geisað að undanförnu en sókn IS-liða virðist vera á undanhaldi vegna ítrekaðra loftárása Bandaríkjamanna og bandamanna þeirra. Hersveitir Kúrda stjórna því nú um sextíu prósent af svæðinu.

Rami Abdel Rahman, forstöðumaður mannréttindavaktarinnar í Sýrlandi, greindi frá þessu í dag og segir hann að liðsmenn IS séu farnir að yfirgefa þau svæði sem Kúrdar hafa ekki lagt í að sækja inn í af ótta við jarðsprengjur.

Yfir þúsund manns hafa fallið í átökunum sem hófust í september.