Pelé klár í að spila með brasilíska landsliðinu

Brasilíska knattspyrnugoðsögnin Pelé er laus af spítala í Sao Paulo þar sem hann lá inni í nokkra daga eftir að hafa veikst illa.

Pelé hélt að sjálfsögðu blaðamannafund eftir að hann losnaði af spítalanum.

Þar fór þessi 74 ára þrefaldi heimsmeistari á kostum og sagðist vera við hestaheilsu.

„Ég er búinn að ná mér að fullu og hef hafið undirbúning fyrir næstu Ólympíuleika. Það mega þrír atvinnumenn spila með landsliðinu á Ólympíuleikunum og ég er einn þeirra," sagði Pelé léttur.

Hann þarf þó að taka því rólega heima hjá sér næstu daga en ætti að hafa náð fullum styrk fyrir jól.