Ný könnun: Íslenskir karlmenn elska rassa meira en brjóst

Íslenskir, gagnkynhneigðir karlmenn eru hrifnari af afturendum kvenna en brjóstum. Þetta kemur fram í könnun sem framkvæmd var af vefsíðunum Pornhub og Youporn í samstarfi við svissneska dagblaðið 20 Minuten.



Skera íslenskir karlmenn sig talsvert úr því ef litið er á heiminn allan eru flestir karlmenn hrifnari af brjóstum en afturendum. Ef aðeins Norðurlöndin eru skoðuð sést að flestir karlkyns íbúar þeirra elska barm kvenna meira en bossa.

Íslenskir karlmenn eru svipaðir og þeir bandarísku þegar kemur að ást á afturendanum og eru karlmenn í fjörutíu fylkjum af fimmtíu hrifnari af rössum. Þá er algengara að suðrænir karlmenn, til dæmis í Síle og Brasilíu, fíli rassa betur en brjóst.

Þessar niðurstöður fengust þannig að öllum leitarorðum síðasta árs var safnað saman.

Kynfræðingurinn Sigga Dögg veit ekki af hverju íslenskir karlmenn eru frábrugðnir öðrum Evrópubúum þegar kemur að þessum efnum.

„Hér er náttúrulega mikill áhugi á rassinum og kynferðislegri örvun á honum og það er erfitt að aðgreina hvort það komi útaf klámi eða öfugt,“ segir Sigga Dögg. Hún bendir á að rassinn sé í tísku, en afturendar hafa einmitt verið mjög áberandi á árinu sem er að líða. Skemmst er frá því að minnast þegar Kim Kardashian beraði sinn á forsíðu tímaritsins Paper.

„Rassinn er í tísku, talinn tabú á meðan brjóst hafa kannski misst sitt tabú því við erum að opnast með brjóstagjöf og bíómyndir eru opnari með að sýna brjóst. Rassinn er ennþá talin svo spennandi og „ósnertanlegur“ samkvæmt sumum en öðrum ekki,“ bætir Sigga Dögg við.

Ef litið er á hvernig heimsbúar skiptast í þessar tvær fylkingar brjósta og rassa eftir heimsálfum sést að Evrópu- og Asíubúar eru mun hrifnari af brjóstum en restin af heiminum, sem og þeir sem búa í Ástralíu. Ef eingöngu Norðurlöndin eru skoðuð sést að Finnar eru hrifnastir af brjóstum. Þeir eru í þriðja sæti ef litið er til þeirra sem elska brjóst mest en á þeim lista eru Íslendingar í 72. Sæti. Danir eru í 10. sæti, Norðmenn í því 21. og Svíar í 27. sæti. Grænlendingar ná 7. sæti á þeim lista en á toppinum tróna íbúar Maldíveyja.

Það eru hins vegar Afríkubúar sem ráða ríkjum á rassalistanum og skipa Afríkuríkin Tansanía, Ghana og Djibouti þrjú efstu sætin. Ef aðeins er horft til Evrópu sést að Íslendingar eru afar hrifnir af afturendum, sem og Hollendingar, Svíar og Finnar.

Hægt er að skoða niðurstöður könnunarinnar nánar hér en önnur leitarorð voru einnig könnuð, svo sem sköp, fótleggir og fætur.