Siggi Raggi: Þakklátur að Rúnar beið

Sigurður Ragnar Eyjólfsson var í dag kynntur til leiks sem nýr aðstoðarþjálfari Rúnars Kristinssonar hjá Lilleström sem leikur í norsku úrvalsdeildinni.

Sigurður Ragnar hafði um tvo kosti að velja en honum bauðst einnig spennandi starf sem tæknilegur ráðgjafi hjá knattspyrnusambandi Ástralíu.

„Þetta var erfið ákvörðun en jákvætt að þetta voru tveir góðir kostir. Ég er mjög sáttur við þá ákvörðun sem ég tók og reyni að standa mig vel hér næstu þrjú árin,“ sagði Sigurður Ragnar þegar Vísir heyrði í honum nú síðdegis.

Hann segir að mikil ferðalög hefði fylgt starfinu í Ástralíu, bæði innanlands sem og í keppnisferðum landsliða Ástralíu til Asíu. „Ástralía er stórt land og einn þáttur starfsins var að samræma þjálfun í öllum níu fylkjum landsins,“ segir Sigurður Ragnar og bætir við að slík ferðalög hefðu bitnað mjög á ungri fjölskyldu hans.

„Það hefði því verið erfitt að draga fjölskylduna svo langt í burtu. Það hafði áhrif á ákvörðun mína,“ sagði Sigurður Ragnar sem líst vel á hinn kostinn - að starfa með Rúnari í Lilleström.

„Það verður spennandi verk að hjálpa klúbbnum að búa til góða leikmenn og ná árangri. Liðið varð í fimmta sæti í haust sem var framar öllum vonum. En félagið er í fjárhagsvandræðum og hefur minna á milli handanna á næsta ári. Það væri góður árangur fyrir okkur að vera um miðja deild,“ segir Sigurður Ragnar.

Þeir Rúnar og Sigurður Ragnar hafa ekki starfað áður saman sem þjálfarar en þekkja þó mjög vel til hvors annars. „Ég hef þekkt hann síðan ég var 12-13 ára gamall. Við erum báðir úr Breiðholtinu og fórum svo í KR, þar sem ég lék með honum fyrstu árin mín í meistaraflokki.“

„Við vorum svo báðir í Belgíu á sama tíma og mættust þar sem leikmenn og þá fór hann í gegnum þjálfaramenntunarkerfið á Íslandi auk þess sem við vorum báðir að þjálfa í Pepsi-deild karla,“ segir Sigurður Ragnar sem starfaði lengi sem fræðslustjóri KSÍ.

„Hann leitaði til mín eftir að það var ljóst að Pétur [Pétursson] yrði ekki aðstoðarmaður hans áfram og mér fannst það strax mjög spennandi kostur. Þeir gáfu mér þó svigrúm til að kanna hitt tilboðið til hlítar og ég er mjög þakklátur fyrir að þeir biðu eftir mér á meðan ég fór í viku til Ástralíu.“

Þeir Sigurður Ragnar og Rúnar hefja formlega störf fyrir félagið í byrjun janúar en hann segir að öll undirbúningsvinna fyrir tímabilið sem er fram undan sé þegar hafin.