Gestum Lofts boðið í heita drykki á Prikinu

Rýma þurfti farfuglaheimilið Loft við Bankastræti sjö vegna brunans á skemmtistaðnum B5 í kvöld. Sigríður Ólafsdóttir, rekstrarstjóri Lofts, segir starfsfólk sitt hafa brugðist rétt við og að vel hafi tekist að rýma staðinn.

„Kerfið okkar fer af stað og á fimm mínútum er búið að koma öllum út, bæði gestum á hostelinu og gestum uppi á kaffihúsi,“ segir Sigríður, en 33 gestir eru skráðir á Loft í nótt og veitingastaðurinn á efstu hæð var einnig þéttsetinn . „Það harka sér allir út og bíða eftir að vita meira. Sumir voru frekar illa klæddir, höfðu bara hlaupið út á peysunni.“

Það kom þó ekki að mikilli sök, því ferðalangarnir voru ekki lengi látnir dúsa úti í kuldanum.

„Við eigum svo góða nágranna hér á Prikinu,“ segir Sigríður. „Ég samdi við þá um að hleypa öllum inn í heita drykki og að fylgjast með því sem var að gerast. Það var ekkert mál.“

Sigríður var stödd á Prikinu þegar Vísir náði af henni tali en þá var hún við það að segja gestunum að þeir gætu snúið aftur á Loft. Engan reyk lagði inn á gistiheimilið og hægt verður að sofa þar í kvöld.

„Fólk tekur þessu ótrúlega vel. Við erum bara svo fegin að ekki fór illa. Ég var komin með plan B í huganum, hvort ég þyrfti að ferja fólk á hin farfuglaheimilin. En sem betur fer kom ekki til þess.“