Bandaríkin kanna hvort vopn hafi lent í höndum IS

Varnarmálaráðuneyti Bandaríkjanna kannar nú hvort hluti vopnasendingu sem ætluð var Kúrdum sem verja bæinn Kobane gegn vígamönnum Íslamska ríkisins hafi endað í höndum vígamannanna. IS birti í gær myndband sem virðist sýna hluta sendingarinnar, sem sjá má hér að neðan.

Talsmaður Pentagon sagði meirihluta 27 vopnasendinga sem varpað var úr flugvélum hafa lent í réttum höndum, samkvæmt BBC. Hann sagði Kúrda stjórna flestum hverfum borgarinnar, en þó stafaði enn ógn af IS.

IS gerði stórsókn gegn Kúrdum í Kobane á mándaginn, en verjendum tókst að brjóta hana á bak aftur með hjálp loftárása frá Bandaríkjunum og bandamönnum þeirra. Bardagar hafa staðið yfir svo vikum skiptir og hafa flestir óbreyttir borgarar flúið til Tyrklands.

Tyrkir segjast ætla að hleypa þeim sem vilja taka þátt í vörn bæjarins yfir landamærin en ekki liggur fyrir hvenær það verður leyft.