Kötturinn stórhækkaði verðið á fasteigninni

Perceval-fjölskyldan í áströlsku borginni Melbourne var búin að vera með hús sitt á sölu um nokkurt skeið og í síðustu viku bárust fyrstu tilboðin. Fljótlega hljóðuðu tilboðin upp á um 216 milljónir króna, en svo fékk fasteignasalinn símtal með fyrirspurn um hvort köttur fjölskyldunnar, Tiffany, mætti fylgja með í kaupunum.

Kaupendurnir sögðust reiðubúnir að greiða fimmtán milljónir meira fyrir eignina auk kattarins þar sem barn kaupendanna hafði tekið sérstöku ástfóstri við köttinn.

Fran Perceval segir í samtali við Herald Sun að Tiffany hafi setið í sófanum þegar mögulegir kaupendur litu við til að skoða eignina. „Fólk gekk framhjá kettinum og klappaði honum. Hún elskaði athyglina.“

Percival-hjónin ákváðu að lokum að þiggja boðið, þó að nítján ára sonur þeirra sem keypti köttinn fyrir fjórum árum hafi verið allt annað en ánægður með ákvörðun foreldra sinna.