Höfuðpaur fíknefnahrings handtekinn

Mexíkóski herinn hafði í gær hendur í hári eins illræmdasta eiturlyfjabaróns landsins, Hector Beltram Leyva, á fjölförnum ferðamannastað í landinu.

Herinn hefur verið á hælum hans í hartnær ellefu mánuði en allt að sjö milljónir bandaríkjadala voru settar honum til höfuðs. Eiturlyfjahringur Beltram Leyva, sem nefndur var í höfuðið á foringjanum hefur í gegnum árin verið einn sá alræmdasti í landi þar sem segja má að borgarastríð hafi geisað sökum mikilla umsvifa glæpaklíka sem stjórna eiturlyfjasmygli til Bandaríkjanna. Hector komst til æðstu metorða í klíkunni árið 2009 eftir að bróðir hans var felldur í árás hersins.