Aukin harka í mótmælunum í Hong Kong

Aukin harka færðist í mótmælin í Hong Kong í dag eftir að æðsti embættismaður Hong Kong, CY Leung, skipaði lögreglu að grípa til nauðsynlegra ráðstafana til að tryggja að hægt væri að opna opinberar skrifstofur og skóla á mánudag. Tugþúsundir tóku þátt í mótmælunum í dag en þau eru sögð þau fjölmennustu frá upphafi mótmælanna.

Til átaka kom í gær þegar þeir sem krefjast lýðræðislegra umbóta í stjórnkerfinu í Hong Kong lenti saman við almenning sem styður Kínastjórn.  Aftur kom til átaka á tveimur stöðum í borginni í dag þar sem hópunum lenti saman. Lögreglan hafnar ásökunum um að hún hafi staðið aðgerðarlaus hjá á meðan átökin áttu sér stað og benda á að 19 manns hafi verið handteknir.

Íbúarnir krefjast þess að kosningar á þarnæsta ári verði án fyrirhugaðra afskipta kínverska kommúnistaflokksins og hafa stjórnvöld nú handtekið og yfirheyrt tugi manna vegna stuðnings við mótmælin. Þykja handtökurnar sýna að kommúnistaflokkurinn óttist nú að krafan um lýðræðisumbætur breiðist út til borga á meginlandinu en þar sæta fréttir af mótmælunum mikilli ritskoðun.

Innlegg frá Nick Wong.

Innlegg frá Adrian Wong Gah Junn.

Innlegg frá FB Newswire.