Fékk innblástur frá Björk og giftist sjálfri sér

Breska konan Grace Gelder giftist sjálfri sér fyrir stuttu. Hún fór með heit og kyssti sjálfa sig með hjálp spegils til að innsigla giftinguna. Þetta kemur fram í viðtali við Grace í breska blaðinu The Guardian.

Um fimmtíu vinir hennar og fjölskyldumeðlimir voru viðstaddir athöfnina.

Grace segist lengi hafa hugsað um að giftast sjálfri sér en innblásturinn fékk hún úr lagi með Björk Guðmundsdóttur.

„Ég man þegar ég var átján ára í háskóla að læra list og heyrði línuna í laginu Isobel með Björk: „Ég heiti Isobel, gift sjálfri mér.“ Ég skildi það, eins brjálað og það hljómar. Þetta snýst um þetta loforð sem þú gefur sjálfri þér og hvernig þú lifir eftir því upp frá þeim degi sem þú giftist,“ segir Grace. Hún útilokar ekki að giftast einhverjum öðrum.

„Sumir kvenkyns kunningjar mínir hafa sagt mér að ég sé fordæmi fyrir konur en ég segi: Af hverju ekki fordæmi fyrir karlmenn líka? Ég sé þetta ekki sem feminíska yfirlýsingu en það veitti mér mikinn kraft að undirbúa brúðkaup sem þetta.“