Talinn hafa kyrkt konuna

Karlmaðurinn sem grunaður er um að hafa orðið eiginkonu sinni að bana í Stelkshólum í Breiðholti í nótt er talinn hafa þrengt að öndunarvegi konunnar þannig að hún lést. Þetta kemur fram í tilkynningu frá lögreglunni.

Í kjölfarið hafði maðurinn samband við annan aðila sem lét lögreglu vita skömmu eftir miðnætti í nótt. Við komu lögreglu á vettvang vaknaði strax grunur um að andlát konunnar hefði borið að með saknæmum hætti.

Börn hjónanna, tveggja og fimm ára voru á heimilinu, en þeim hefur verið komið í viðeigandi umönnun hjá barnaverndaryfirvöldum. Konan sem lést var 26 ára og eiginmaður hennar 28 ára.

Yfirheyrslur yfir hinum grunaða standa nú yfir og lögð verður fram krafa um gæsluvarðhald vegna rannsóknarhagsmuna síðar í dag.