Leita leiða til að aflétta fjármagnshöftum

Skipaður hefur verið framkvæmdahópur sem mun gera tillögur að leiðum til að létta fjármagnshöftum af íslensku efnahagslífi. Sú vinna mun byggja á tillögum ráðgjafahóps um heildstæða lausn sem mun taka á öllum þáttum fjármagnshaftanna. Þessu greindi Sigmundur Davíð Gunnlaugsson forsætisráðherra frá í stefnuræðu sinni á Alþingi í kvöld.

„Stjórnvöld hafa sér til aðstoðar afar færa erlenda sérfræðinga á sviði lögfræði auk efnahagslegra ráðgjafa sem aðstoða við mótun þjóðhagslegra skilyrða.  Efnahagsstefna stjórnvalda við afnám fjármagnshafta verður byggð á þessum skilyrðum ásamt ítarlegri greiðslujafnaðargreiningu,“ sagði Sigmundur.

Þá tók hann fram að breytinga sé þörf á húsnæðismarkaðnum og að nauðsynlegt sé að byggja upp virkan langtímaleigumarkað. Sagði hann félags- og húsnæðismálaráðherra stefna að því að leggja fram fjögur lagafrumvörp sem miða að bættri skipan húsnæðismála.

Hægt er að fylgjast með umræðunum í beinni útsendingu hér á Vísi.