Skotland verður aldrei eins og áður

Þingmaður Skorska þjóðarflokksins á breska þinginu segir að hvernig sem úrslit verði í þjóðaratkvæðagreiðslu um sjálfstæði Skotlands í næstu viku verði staða Skotlands allt önnur en nú.

Mikið sé í húfi fyrir stjórnmálaelítuna í Lundúnum sem reyni að hræða Skota frá því að velja sjálfstæði.

Skotar ganga til þjóðaratkvæðagreiðslu um sambandsslit við Bretland á fimmtudag í næstu viku. Lengst af hafa sambandssinnar haft verulegt forskot í könnunum en dregið hefur sman með Já og Nei fylkingunum undanfarnar vikur og Já hreyfingin jafnvel komist yfir.

Angus Robertsson sem kom hingað til lands í heimsókn í október í fyrra til að efla samskipti Íslendinga og Skota, er einn leiðtoga sjálfstæðissinna og situr á breska þinginu fyrir Skorska þjóðarflokkinn.

„Við höfum unnið að kappi alla þessa síðustu viku fyrir kosningarnar 18. september nk.

Kannanir á undanförnum vikum hafa sýnt að fylgi sjálfstæðissinna hefur aukist,” segir Robertson.

Nú einbeiti sjálfstæðissinnar sér að því að blása landsmönnum bjartsýni og kjark í brjóst. En leiðtogar stóru flokkanna í Bretlandi, Íhaldsflokksins, Verkamannaflokksins og Frjálslyndra eru farnir að hafa áhyggjur af niðurstöðunni og heimsóttu Skotland í gær til að hvetja fólk til að segja nei.

„Stjórnmálaöflin í Lundúnum gera sér nú grein fyrir að fylgi við sjálfstæði er mun meira en þau töldu. Menn gera sér nú grein fyrir að þeim er vandi á höndum og nú, undir lok kosningabaráttunnar, reyna þeir hvað þeir geta að hræða okkur til að segja nei,” segir Robertson.

Hann er bjartsýnn á sigur Já fylkingarinnar en segir að jafnvel þótt sambandssinnar færu með sigur á fimmtudag hafi allt breyst í stöðu Skotlands.

„Stjórnmálin verða aldrei þau sömu aftur. Hver svo sem úrslitin verða vitum við að u.þ.b. helmingur íbúa Skotlands vill ekki láta stjórna sér frá Lundúnum. Það eru afar sterk skilaboð til stjórnmálamanna í Lundúnum,“ sagði Angus Robertson í samtali við fréttastofu Stöðvar tvö í dag.