Breskir ferðamenn myrtir í Taílandi

Lík tveggja breskra ferðamanna fundust á strönd á Koh Tao eyjunni í Taílandi í gær. David Miller, 24 ára og Hanna Witheridge, 23 ára, frá Norfolk, fundust látin skammt frá gististað þeirra á eyjunni. Töluverðir áverkar voru á líkunum og bæði voru þau án klæða. Þá fannst blóðug arfaskafa skammt frá líkunum í gær, sem talin er hafa verið notuð við verknaðinn. Lík þeirra verða flutt til  Bangkok í dag þar sem þau verða krufin.

Taílenska lögreglan leitar nú logandi ljósi að vitnum og vísbendingum sem gæti leitt hið sanna í ljós en tveir menn frá Búrma voru í dag yfirheyrðir af lögreglu. Að sögn starfsmanns á svæðinu er þetta í fyrsta sinn sem svo skelfilegur atburður á sér stað á þessum slóðum, en eyjan er afar vinsæll ferðamannastaður.