Freyr: Þóra var langt á undan sinni samtíð

Freyr Alexandersson, landsliðsþjálfari, lofaði feril Þóru B. Helgadóttir sem lagði landsliðshanskana á hilluna í gær eftir sextán ára feril með landsliðinu.

Þóra skoraði meira að segja eitt mark í 9-1 sigri Íslands á Serbíu á Laugardalsvellinum.

„Hún er frábær íþróttamaður, fyrst og fremst. Mér finnst hún stórkostleg,“ sagði Freyr í samtali við Vísi eftir leikinn í gær.

„Ég hef verið að skoða klippur af henni frá 1999 og þar er hún að gera hluti sem ný kynslóð markverða, eins og Rúnar Alex [Rúnarsson] og fleiri, gerir vel. Eins og að vera tæknilega góð í fótunum. Þóra hefur verið þannig frá 1999 og var því langt á undan sinni samtíð.“

Hann segir að Þóra hafi reynst frábær liðsfélagi samherja sinna en að hann hafi einnig leitast við að fá álit hennar á ýmsum málum.

„Hún er eldklár og hefur mjög sterkar skoðanir. Ég ákvað að nýta mér það og gekk á hana með ýmislegt. Við skiptumst á skoðunum og það vil ég fá frá leikmönnum.“

„Ég vona að fjölmiðlar og íþróttaheimurinn átti sig á því hversu frábær íþróttamaður hún er, hafi menn ekki gert það nú þegar. Hún hefur verið í fremstu röð síðan 1998 og það eitt og sér er frábært afrek.“

„Ég er þakklátur fyrir að hafa fengið að vinna með henni. Það hefur verið frábært.“