Tap Stjörnumanna á San Siro var ekki það stærsta í kvöld

Stjarnan fékk stóran skell á móti ítalska félaginu Internazionale á San Siro í kvöld en ítalska liðið vann 6-0. Þetta var samt ekki stærsta tap kvöldsins í Evrópudeildinni.

Þýska liðið Borussia Mönchengladbach vann á sama tíma 7-0 sigur á bosníska liðinu Sarajevo á Borussia-Park í Mönchengladbach. Borussia Mönchengladbach vann samanlagt 10-2.

Svíinn Branimir Hrgota skoraði þrennu fyrir Borussia Mönchengladbach en hann er aðeins 21 árs gamall. Thorgan Hazard skoraði tvö mörk í leiknum þar af annað þeirra úr vítaspyrnu.

Ítalska liðið jafnaði metið yfir stærst sigur félagsins í Evrópukeppni en Internazionale hefði auðveldlega getað skorað fleiri mörk ef Ingvar Jónsson hefði ekki varið nokkrum sinnum frábærlega í marki Stjörnunnar.