Treyjunúmer Valbuena lagt til hliðar

Franska knattspyrnuliðið Olymipique de Marseille hefur lagt treyju númer 28 til hliðar til heiðurs Mathieu Valbuena sem gekk til liðs við Dinamo Moskvu á dögunum.

Þetta var tilkynnt á blaðamannafundi í dag. Valbuena virtist hrærður og felldi tár við tilefnið.

Valbuena kom til Marseille frá Libourne sumarið 2006 og lék yfir 300 leiki með franska stórliðinu og skoraði 46 mörk.

Hann varð franskur meistari með Marseille tímabilið 2009-10. Valbuena vann auk þess franska deildarbikarinn í þrígang meðan hann var í herbúðum liðsins.

Valbuena, sem er 29 ára, kostaði Dinamo sex milljónir punda. Hann gerði þriggja ára samning við rússneska liðið.