Anna Mjöll að skilja

Anna Mjöll Ólafsdóttir söngkona stendur á tímamótum. Hún er að skilja við bandaríska eiginmann sinn, Luca Ellis sem hún gekk að eiga í Árbæjarkirkju í fyrra en horfir björtum augum fram á við og undirbýr nú tónleika sem fram fara á Rosenberg á mánudaginn. 

,,Þetta er nú bara búið að vera frekar erfitt allt saman. Okkur þykir voða vænt um hvort annað en við erum sennilega betri sem vinir en sem hjón. Það tekur sex mánuði að skilja í Kaliforníu. Við sóttum um skilnaðinn í apríl svo að þetta á allt saman að vera orðið endanlegt í lok október," segir Anna Mjöll.

Þetta er annað hjónaband Önnu en hún giftist þekktum bandarískum bílasala Cal Worthington árið 2011 og sótti um skilnað í lok sama árs. Bílasalinn lést í september í fyrra. Eftir fráfall hans ræddi Anna Mjöll í einlægni við Lífið um söknuðinn.

Heldur tónleika á Íslandi

Anna Mjöll undirbýr nú tónleika sem fara fram á Café Rosenberg mánu­dag­inn 21. júlí. Sérstakir gestir verða móðir Önnu, Svanhildur Jakobsdóttir söngkona, og trommarinn Dave Weckl.

Á tónleikunum syngur Anna Mjöll meðal annars lög með Ellu Fitzgerald, Billie Holiday, Astrud Gilberto, Frank Sinatra og Marilyn Monroe. Hljómsveit Önnu skipa Jóhann Hjörleifsson, Ásgeir Ásgeirsson, Gunnar Hrafnsson og Reynir Sigurðsson.

Meiri upplýsingar um tónleikana hér á midi.is.

Anna Mjöll er eina fastráðna söngkonan í glæsilegasta djassklúbbi Los Angeles borgar ,,Herb Alpert's Vibrato" sem er í Bel Air hverfinu í Los Angeles en þar syngur hún jafnan fyrir troðfullu húsi með Pat Senatore tríóinu. 

Hér má lesa forsíðuviðtal Lífsins við Svanhildi.