Villa kvaddi með marki og tárum í sigri Spánar

Spánn lauk keppni á HM 2014 í fótbolta með 3-0 sigri á Áströlum í lokaumferð B-riðils. Hvorugt liðið átti möguleika á að komast upp úr riðlinum fyrir leikinn sem var aðeins upp á heiðurinn.

David Villa kom Spáni yfir á 36. mínútu en hann var að skora 59. landsliðsmark sitt í 97. landsleiknum. Hann er langmarkahæstur í sögu spænska landsliðsins en næstur kemur Real-maðurinn Raúl með 44 mörk í 102 leikjum.

Villa var tekinn af velli á 57. mínútu í sínum síðasta landsleik, en tilfinningarnar báru hann ofurliði þegar hann settist á varamannabekk spænska liðsins í síðasta sinn.

Þessi magnaði markaskorari réði ekkert við táraflóðið en hann má vera heldur betur stoltur af gjörsamlega lygilegum landsliðsferli.

Varamaður hans, Juan Mata, skoraði á 82. mínútu en á undan því hafði FernandoTorres komið boltanum í netið á 69. mínútu. Torres fjórði Spánverjinn til að skora fjögur mörk á heimsmeistaramóti.

Heimsmeistarar Spánar eru engu að síður úr leik eftir riðlakeppnina og verja ekki titil sinn eins og var ljóst eftir tapið gegn Síle í síðustu umferð.