Eiður Smári: Ekki sá sami án fjölskyldunnar

Eiður Smári Guðjohnsen segir að hann hafi áhuga á að halda áfram að spila knattspyrnu þó svo að hann sé án félags sem stendur.

Hann hefur undanfarin tvö ár leikið í belgísku úrvalsdeildinni en í viðtali við Viðskiptablaðið segist hann áhugasamur um að finna sér nýtt lið.

„Ég hef allt of gaman að þessu. Ég lenti í meiðslum snemma á ferlinum og aftur seint. Á þessu tímabili þurfti ég hinsvegar ekki að sleppa neinni æfingu út af meiðslum og er í líkamlega fínu standi. Þess vegna kemur sú hugsun alltaf upp að á meðan ég get spilað, á meðan ég er meiðslalaus, hef gaman að þessu og fæ borgað fyrir það sem maður elskar þá finnst mér ekki rétt að hætta. En auðvitað kemur að því einn daginn,“ segir Eiður Smári.

Í viðtalinu segir Eiður Smári einnig frá fjölskyldu sinni en hún hefur búið áfram á Spáni á meðan hann hefur spilað í öðrum löndum undanfarin ár.

„Það er ekki sagt til að nota sem afsökun en ég held að þegar rótleysi kom á fjölskyldulífið og ég var einn og hafði ekki sama stuðning og alltaf þá sást það inni á vellinum. Ég var ekki sá sami og náði ekki að sýna það sem ég gat.  Það sýnir sig þá hversu mikinn stuðning ég hef alltaf haft og hversu vanmetinn hann er."

Viðtalið birtist í heild sinni í Eftir vinnu, fylgiriti Viðskiptablaðsins, á morgun.