Mamma stolt: Fjölmiðlafár um ákvörðun Arons tók ekki á fjölskylduna

 „Ég held að maður sé ekki alveg að meðtaka þetta,“ segir Helga Guðmundsdóttir, mamma Arons Jóhannssonar leikmanns bandaríska landsliðsins í fótbolta. En eins og flestum er kunnugt hefst Heimsmeistaramót landsliða í knattspyrnu karla í dag og tekur Aron þátt í mótinu, fyrstur Íslendinga.

Foreldrar Arons, Helga og Jóhann Gíslason, ætla að fara til Brasilíu til að fylgjast með drengnum sínum keppa á mótinu. „Við ætlum ekki að sjá fyrsta leikinn en stefnum á að sjá hina leikina tvo.“ Þau fljúga til Brasilíu þann 19. júní. „Við erum að fara á vegum US Soccer, þeir eru með þaulskipulagt familíu prógramm fyrir okkur.“  US Soccer hefur pantað hótel fyrir fjölskyldur allra leikmanna, leigt sérstakar rútur og flugvélar fyrir ferðirnar frá hótelinu að leikvangnum þar sem bandaríska liðið kemur til með að spila. „Manni finnst það svolítið skrýtið en liðið, bandaríska, er staðsett í Sao Paulo en spilar engan af sínum leikjum þar. Þannig að liðið, og fjölskyldurnar, þurfa að fljúga þrjá til fjóra tíma á hvern einasta leik.“

Helga hefur ekki trú á öðru en að hún fái að verja einhverjum tíma með syni sínum en auk þess fá foreldrar leikmanna tækifæri til að kynnast innbyrðis. „Þetta er ábyggilega bara eins og að fara til Eyja með Fjölnismönnum,“ segir Helga og hlær. „Þetta er örugglega mikið návígi.“  Aron spilaði með Fjölni hér á Íslandi áður en hann flutti utan og fór að spila fótbolta í Danmörku og nú Hollandi. 

Faðirinn fyrstur með hugmyndina um bandaríska landsliðstreyju

Helga segir fjölskylduna að vonum rosalega stolta yfir þessum árangri. 

En gerðuð þið einhvern tímann ráð fyrir því að hann myndi ná svona langt?

 „Já,“ svarar hún óhikandi. „Pabbi hans hafði alltaf trú á því,“ bætir hún við.  Í myndbandinu sem fylgir með fréttinni er örstutt en einlægt viðtal við Aron. Þar talar hann um óbilandi trú föður síns. „Pabbi var líkast til minn stærsti aðdáandi þegar ég var lítill,“ segir Aron í myndbandinu. Hann bætir við að það hafi farið örlítið í taugarnar á honum þegar hann var lítill hvað pabbi hans var gjarn á að taka myndavélina með á völlinn en það hafi breyst í dag. Þar kemur einnig fram að pabbi hans hafi verið sá fyrsti til að hvetja hann til þess að spila með Bandaríkjunum. „Ég sagði bara við hann: „Hættu þessu, það mun aldrei gerast.“ Draumurinn var alltof langt í burtu geri ég ráð fyrir,“ segir Aron.    

Stóðu með syni sínum – ákvörðunin sem hann tók var rétt

„Það var enginn hér sem tók þetta neitt sérstaklega inn á sig,“ svarar Helga spurð að því hvort að það hafi ekki tekið á fjölskylduna það fjölmiðlafár sem varð í kringum ákvörðun Arons um að kjósa heldur að spila með bandaríska landsliðinu heldur en því íslenska. „Það mega bara allir hafa sína skoðun. Þannig er það bara. Við höfðum engar áhyggjur af þessu.“ Helga segist aldrei hafa annað en stutt son sinn í þeirri ákvörðun sem hann tók. „Hvaða ákvörðun sem hann hefði tekið, að spila með því bandaríska eða íslenska, þá hefði það verið rétt. Auðvitað spurði hann okkur álits, en þetta var alfarið í hans höndum. En hann tók rétta ákvörðun að lokum, ég trúi því.“ 



Nærmynd verður um Aron í Íslandi í dag í kvöld klukkan 18.54 á Stöð 2. Verður þar rætt við fleiri ættingja hans og vini.