Scolari: Verðum að skora fyrst

Önnur umferð riðlakeppninnar á HM í Brasilíu hefst í kvöld þegar Brasilía mætir Mexíkó í A-riðli.

Bæði lið eru með þrjú stig eftir sigra í fyrstu umferðinni. Brasilía vann Króatíu, 3-1, og Mexíkó lagði Kamerún með einu marki gegn engu.

Luiz Felipe Scolari, landsliðsþjálfari Brasilíu, ítrekaði að það mætti ekki endurtaka sig að hans menn lendi marki undir í kvöld, líkt og gerðist gegn Króötum.

„Mexíkó á sér ríka hefð á HM og iðulega komist áfram úr riðlakeppninni. Það veitir þeim sjálfstraust,“ sagði Scolari.

„Aðalmálið verður að lenda ekki undir. Það er ýmislegt sem maður getur ekki stjórnað í fótbolta og við verðum að einbeita okkur að þeim atriðum sem eru á okkar valdi,“ sagði hann enn fremur.