Scolari: Oscar var frábær

Ofurstjarnan Neymar skoraði tvö mörk í 3-1 sigri Brasilíu á Króatíu í upphafsleik HM 2014 í fótbolta í gærkvöldi en það var Oscar, leikmaður Chelsea, sem stal senunni.

Oscar var besti maður vallarins og innsiglaði sigur Brassanna undir lok leiksins með skemmtilegu marki með táni eftir laglegan einleik.

„Tölfræði okkar sýnir að hann var maðurinn sem tæklaði flesta, fór best með boltann og gaf oftast fyrir. Hann var aðalmaðurinn í sókninni hjá okkur í leiknum,“ sagði Luiz Felipe Scolari, þjálfari Brasilíu eftir leikinn.

Oscar sætti gagnrýni fyrir frammistöðu sína með landsliðinu í vináttuleikjunum í aðdraganda HM.

„Hann var frábær og spilaði eins og sá leikmaður sem ég veit að hann er. Ég hef alltaf haft trú á honum. Allar efasemdir komu frá fjölmiðlum. Oscar hefur ekki verið að spila frábærlega upp á síðkastið en ég hafði trú á honum,“ sagði Luiz Felipe Scolari.

Stöð 2 Sport 2 verður með 18 leiki í beinni frá HM í Brasilíu, þar af alla leiki Arons Jóhannssonar. Gummi Ben verður svo með HM-messu þar sem sérfræðingar fara yfir leiki dagsins og hita upp fyrir leik kvöldsins.

Kynntu þér málið nánar á 365.is.