Úrslitum sjö landsleikja hagrætt í aðdraganda HM 2010

Fréttastofa Sky Sports greinir frá því í morgun að hún hafi undir höndum afrit af leynilegri skýrslu FIFA sem leiðir í ljós að úrslitum í a.m.k. sjö vináttulandsleikjum, sem spilaðir voru í aðdraganda HM 2010 í Suður-Afríku, var hagrætt.

Wilson Raj Perumal, glæpamaður frá Singapúr sem stundar það að hagræða úrslitum leikja, á hlut í máli en hann notaði eitt fyrirtækja sinna til að útvega dómara í leikina sem um ræðir.

Perumal, sem nú afplánar tveggja ára fangelsisvist í Finnlandi fyrir að hagræða úrslitum, heldur því fram að samtök sín hafi grætt milljónir punda á hverju ári með þessu svindli.

Í maí 2010 skrifuðu singapúrsku samtök Perumals undir samning við knattspyrnusamband Suður-Afríku sem fól það í sér að þau myndu útvega dómara fyrir vináttulandsleiki í aðdraganda heimsmeistarakeppninnar.

Dómararnir fengu svo allt að því átta milljónir króna fyrir að hagræða úrslitum leikjanna, að því fram kemur í frétt Sky Sports.

Þeir sem rannsaka málið fyrir FIFA telja að fimm leikjum suðurafríska landslisðins hafi verið hagrætt. Það voru: 4-0 sigur á Taílandi, 1-1 jafntefli við Búlgaríu, 2-1 sigur á Kólumbíu, 5-1 sigur á Gvatemala og 1-0 sigur á Danmörku. Leikirnir fóru fram í maí og júní fyrir fjórum árum og sæta nú allir rannsókn.

Aðrir leikir sem talið er að úrslitum hafi verið hagrætt í eru 3-1 sigur Nígeríu á Suður-Kóreu og markalaust jafntefli Japans gegn Simbabve.

FIFA viðurkenndi í síðustu viku að nú þegar hefur verið reynt að hafa áhrif á úrslit leikja á HM í Brasilíu.