Ronaldo glímir við hnémeiðsli

Portúgalar hafa nú meiri áhyggjur með hverjum deginum af ástandinu á CristianoRonaldo en portúgalska knattspyrnusambandið hefur staðfest að hann glímir við hnémeiðsli.

Ronaldo hefur einnig átt í vandræðum með kálfann á sér síðustu vikur og var hvíldur í vináttuleiknum gegn Grikklandi á dögunum.

Nú hefur sinabólga í hné bæst við kálfameiðslin, en Ronaldo æfði ekki með liðinu í vikunni heldur var í sérstökum skokkhóp ásamt Pepe, Raul Meireles og Beto sem einnig glíma við meiðsli.

Þetta er mikið áfall fyrir Paulo Bento, landsliðsþjálfara Portúgals, sem vonast að sjálfsögðu til að besti leikmaður liðsins verði fullfrískur á HM. Án hans gerði Portúgal markalaust jafntefli við Grikkland í umræddum vináttuleik.

Portúgal er í sannkölluðum dauðariðli á HM, en það leikur í D-riðli með Þýskalandi, Gana og Bandaríkjunum.

Nani, leikmaður Manchester United og portúgalska landsliðsins, segir Ronaldo sjálfan hafa litlar áhyggjur af stöðu mála.

„Staðan er ekki svo alvarleg. Ronaldo gengur vel og hann er rólegur yfir þessu. Við vonum auðvitað að hann verði í góðu standi og geti spilað,“ segir Nani.

Cristiano Ronaldo, sem er 29 ára gamall, er markahæsti leikmaður í sögu portúgalska landsliðsins. Hann hefur skorað 49 mörk í 110 landsleikjum.

Hann vantar 18 leiki til viðbótar til að verða leikjahæstur en Luis Figo spilaði 127 leiki fyrir Portúgal á sínum glæsta ferli.