Íslendingar á skotskónum í norska bikarnum

Matthías Vilhjálmsson var tvisvar á skotskónum í öruggum sigri Start á Vard Haugesund í norska bikarnum í dag.

Matthías skoraði fyrra mark sitt eftir aðeins fjórar mínútur áður en hann nældi sér í gult spjald í fyrri hálfleik. Mattías gerði síðan endanlega út um leikinn með fjórða marki Start stuttu fyrir lok leiksins. Guðmundur Kristjánsson var ekki í leikmannahóp Start í dag.

Það voru íslensku leikmenn Viking sem sáu um fyrstu tvö mörk liðsins í 3-0 sigri á neðri deilar liðinu Egersunds. Sverrir Ingi Ingason, Indriði Sigurðsson, Björn Daníel Sverrisson og Steinþór Þorsteinsson voru í byrjunarliði Viking.

Steinþór skoraði fyrsta mark leiksins eftir aðeins tólf mínútur áður en Björn Daníel bætti við öðru marki Viking stuttu síðar. Eftir það voru úrslitin aldrei í hættu og bætti Veton Berisha við þriðja marki Viking í seinni hálfleik áður en leikurinn var flautaður af.

Leikur Valerenga og Lyn hófst klukkutíma seinna og er staðan í honum 2-0 fyrir Valerenga í hálfleik. Viðar Örn Kjartansson er að sjálfsögðu í byrjunarliði Valerenga en er ekki kominn á blað.

Úrslit dagsins:

Egersunds 0-3 Viking

Floro 1-2 Molde

Fyllingsdalen 1-3 Brann

Kristiansund 0-1 Aalesund

Lilleström 4-1 Kongsvinger

Mjondalen 1-0 Ull/Kisa

Notodden 0-4 Odd

Sarpsborg 08 2-0 Follo

Sogndal 3-0 Strommen

Start 4-0 Vard Haugesund