David Villa lánaður til Melbourne í Ástralíu

David Villa mun spila í Ástralíu í nokkra mánuði áður en hann heldur til New York City FC í Bandaríkjunum.

Melbourne og New York City FC eru bæði í eigu enska úrvalsdeildarfélagsins Manchester City og því nátengd. Villa mun spila í Ástralíu í október og nóvember áður en tímabilið hefst í MLS-deildinni.

„Þetta er frábær kostur fyrir mig að öllu leyti,“ sagði Villa sem varð spænskur meistari með Atletico Madrid í vor og hársbreidd frá því að vinna Meistaradeild Evrópu með félaginu.

„Það er gott að fá að prófa nýja deild í nýju landi og gott fyrir mig að spila alvöru fótbolta áður en nýtt tímabil hefst í MLS. Ég er viss um að þetta verði frábær reynsla fyrir mig.“

Villa er í landsliðshópi Spánar sem mætir einmitt Ástralíu á HM í Brasilíu í sumar.